मुंबई : कोरोनाच्या पार्श्वभूमीवर यंदा राज्यात गणेशोत्सव साध्या पद्धतीने साजरा करण्यात येत आहे. आज रविवारी (23 ऑगस्ट) रोजी दीड दिवसांच्या गणपतीचे विसर्जन केले जाणार आहे. कोरोनाच्या पार्श्वभूमीवर गर्दी टाळण्यासाठी मुंबई महापालिकेकडून थेट समुद्रात मूर्ती विसर्जन न करण्याचे आवाहन करण्यात आलं आहे. (One and half day Ganesh Visarjan BMC Guidelines)
यंदाच्या गणेशोत्सवातील पहिला विसर्जन सोहळा आज पार पडणार आहे. मुंबईसह सर्वत्र शनिवारी बाप्पांचे वाजत गाजत मोठ्या उत्साहा आगमन झाले. परंपरेनुसार दीड दिवसांच्या गणपतीचे काल आगमन झाले. त्यानंतर आज दुपारनंतर दीड दिवस पूर्ण झाल्यानंतर गणेश मूर्तींचे विसर्जन केले जाणार आहे.
गणपती विसर्जनासाठी मुंबई महापालिकेकडून नियमावली तयार करण्यात आली आहे. त्यानुसार, घरगुती तसेच सार्वजनिक गणपतींचे हे थेट समुद्रात करता येणार नाही. तसेच पालिकेकडून जागोजागी मूर्ती संकलन केंद्र तयार करण्यात आली आहेत. त्याशिवाय गणेश भक्तांसाठी ठिकठिकाणी कृत्रिम तलावाची सोय करण्यात आली आहे.
दरम्यान भाविकांनी शक्यतो घरातच बादली किंवा ड्रममध्ये मूर्तीचे विसर्जन करावे, अशीही सूचना पालिकेकडून देण्यात आली आहे. (One and half day Ganesh Visarjan BMC Guidelines)
महापालिकेकडून गणेश विसर्जनसाठी ही आहे नियमावली…
घरगुती गणेशोत्सव साजरा करणा-या भाविकांनी गणेशमूर्तीचे विसर्जन घरच्या-घरी बादलीत किंवा ड्रममध्ये करावे.
मुंबई शहरात एकूण ७० नैसर्गिक विसर्जन स्थळे आहेत. या नैसर्गिक विसर्जन स्थळांवर नागरिकांना किंवा सार्वजनिक गणेशोत्सव मंडळांच्या कार्यकर्त्यांना थेट पाण्यात जावून मूर्ती विसर्जन करण्यास प्रतिबंध आहे.
नैसर्गिक विसर्जन स्थळांवर महापालिकेद्वारे अतिरिक्त मनुष्यबळ देवून मूर्ती संकलनाची शिस्तबद्ध व्यवस्था उपलब्ध करुन देण्यात आली आहे.
प्रतिबंधित क्षेत्र (containment zone) मध्ये असणा-या सार्वजनिक गणेशोत्सव मंडळाच्या मूर्तीचे विसर्जन मंडपातच करावयाचे आहे किंवा विसर्जन पुढे ढकलावयाचे आहे. सिल्ड इमारतींमधील (sealed building) गणेशमूर्तीचे विसर्जनासाठी घरीच व्यवस्था करावयाची आहे, याची कृपया नोंद घ्यावी.
मूर्ती संकलन केंद्रावर, कृत्रिम तलावांवर किंवा नैसर्गिक विसर्जन स्थळांवर उपलब्ध महापालिकेच्या व्यवस्थापनाकडे मूर्ती सुपूर्द करण्यापूर्वी मूर्तीची यथासांग पूजा व आरती घरीच किंवा मंडळाच्या मंडपातच करुन घेणे बंधनकारक आहे.
महापालिकेने विशेष व्यवस्था म्हणून ट्रकवर टाक्या किंवा इतर व्यवस्था करुन फिरती विसर्जन स्थळे (mobile spots on wheel) निर्माण केलेली आहेत, त्याचाही लाभ भाविकांनी घ्यावा.
२०२० गणेशोत्सवा दरम्यान कोणत्याही मिरवणुकीस परवानगी नाही, याची देखील भाविकांनी नोंद घ्यावी.
नैसर्गिक विसर्जन स्थळांवरील गर्दी कमी होण्यासाठी महापालिकेच्या २४ विभागांमध्ये सुमारे १७० कृत्रिम तलावदेखील निर्माण करण्यात आले आहेत. कृत्रिम तलावालगत राहणा-या भाविकांना नैसर्गिक विसर्जन स्थळांवर जाण्यास मनाई असल्याने सदर कृत्रिम तलावाचा वापर लगतच्या भाविकांनी करणे बंधनकारक आहे.
महापालिकेच्या प्रत्येक विभागांतर्गत ७ ते ८ गणेशमूर्ती संकलन केंद्रे निर्माण करण्यात आली आहेत. त्याची माहिती तसेच कृत्रिम तलावांची माहिती पत्त्यासह तसेच गुगल लोकेशनसह महापालिकेच्या https://portal.mcgm.gov.in या संकेत स्थळावर उपलब्ध आहे.
विसर्जना दरम्यान सामाजिक दूरीकरण अंतर (social distancing), मास्क/मुखपट्टी, सॅनिटायझर वापरणे इत्यादी आरोग्य संबंधित नियमांचे काटेकोरपणे पालन करावे, असे आवाहन महापालिका प्रशासनाद्वारे करण्यात येत आहे. (One and half day Ganesh Visarjan BMC Guidelines)
