मुंबई: मुंबईसह राज्यात कोरोनाचा प्रकोप वाढला आहे. या पार्श्वभूमीवर रुग्णांसाठी मुंबईत महापालिकेकडून गेल्या सात दिवसात विविध रुग्णालयात 3 हजार कोव्हिड बेड तयार करण्यात आले आहेत. मुंबईत बेडची संख्या 12 हजार 906 वरुन 15 हजार 971 वर पोहोचली आहे. दरम्यान, वाढत्या कोरोना रुग्णांमुळे मुंबईत सध्या 4000 बेड शिल्लक आहेत. अशी माहिती मुंबई महापालिका आयुक्तांनी दिली आहे.mumbai-corona-updates-4000-beds-left-not-to-wait-for-favorite-hospital-appeal-from-bmc-commissioner-news-update
आवडते रुग्णालय – बेडची वाट पाहू नका
मुंबईत विविध रुग्णालयात गेल्या सात दिवसात 3000 कोविड बेड तयार करण्यात आले आहेत. त्यामुळे बेडची संख्या 12 हजार 906 वरुन 15 हजार 971 इतकी झाली आहे. मुंबईत सध्या 4000 बेड शिल्लक आहेत. त्यामुळे मुंबईतील रुग्णांनी आवडीनुसार बेडची वाट बघू नये. सर्व ठिकाणी प्रोटोकॉलसारखे उपचार केले जातात. आवडत्या रुग्णालयाची किंवा बेडची प्रतीक्षा करुन उगाच रोगाची तीव्रता वाढवू नका, असे आवाहन पालिका आयुक्तांनी केले आहे.
कोविड रुग्णांसाठी पुन्हा बेड वाढवण्यात येणार
मुंबईत रुग्णसंख्या वाढल्याने पालिकेचे बेड नियोजन सुरु आहे. मुंबईत दररोजची रुग्णसंख्या थेट आठ हजारांवर गेली आहे. त्यामुळे पालिकेने वेगाने बेड वाढवण्यास सुरुवात केली आहे. यासाठी मुंबईतील 69 नर्सिंग होमही ताब्यात घेण्यास सुरुवात केली आहे.
वाढत्या कोरोनाच्या पार्श्वभूमीवर मुंबई पालिकेला दररोज शेकडो बेडची आवश्यकता भासत आहे. त्यामुळे याआधी खासगी रुग्णालयातील 80 टक्के बेड आणि 100 टक्के आयसीयू पालिकेने ताब्यात घेतले आहेत. यानंतर आता 69 नर्सिंग होमही ताब्यात घेण्यात येत आहेत.
जानेवारीमध्ये मुंबईतील रुग्णसंख्या आटोक्यात आल्यामुळे या नर्सिंग होममध्ये ‘नॉन कोविड’ रुग्णांवर उपचार करण्यास परवानगी देण्यात आली होती. मात्र आता या ठिकाणी कोविड रुग्णांसाठी पुन्हा आवश्यकतेनुसार बेड वाढवण्यात येणार आहेत.
मुंबईतील 35 बडया खासगी रुग्णालयांमध्येही बेड उपलब्ध
मुंबईतील 30 ते 35 बडय़ा खासगी रुग्णालयांमध्येही कोविड रुग्णांसाठी बेड उपलब्ध करून देण्यात आले आहेत. या ठिकाणी शासनाच्या दरपत्रकानुसार शुल्क आकारण्याचे निर्देश देण्यात आले आहेत. यावर नजर ठेवण्यासाठी पालिका अधिकाऱ्यांचीही नेमणूकही करण्यात आली आहे.
राज्यात 3 एप्रिल रोजी एका दिवसात कोरोनाचे तब्बल 49447 नवे रुग्ण आढळले. तसेच तीन एप्रिलला दिवसभरात तब्बल 277 कोरोनाग्रस्तांचा मृत्यू झाला. कोरोनाचा प्रादुर्भाव कमी झाल्यापासून 3 एप्रिलला दिवसभरात प्रथमच कोरोना रुग्ण 50 हजाराच्या जवळपास गेले. या आकडेवारीमुळे राज्याची चिंता वाढली आहे.
राज्यातील मुंबई, पुणे यांसारख्या शहरांत कोरोनानं अक्षरशः कहर केला आहे. शनिवारी कोरोनाचे 9,090 रुग्ण सापडल्याची माहिती मुंबई महापालिकेनं दिली आहे. मुंबईत सद्यस्थितीत 62 हजार 187 कोरोना सक्रिय रुग्ण आहेत. या पार्श्वभूमीवर राज्य सरकारकडून निर्बंध लावण्यात येण्याची शक्यता वर्तवली जात आहे.
