राणेंच्या मुंबईतल्या आधिश बंगल्यात किती ठिकाणी बेकायदा बांधकाम? वाचा संपूर्ण यादी

मुंबई: भाजपचे केंद्रीय मंत्री नारायण राणे (Narayan Rane) यांनी जुहू येथील आधीश बंगल्यात 9 ठिकाणी बेकायदा बदल (Unauthorized construction) केल्याचे मुंबई महापालिकेच्या (Mumbai Municipal Corporation) पथकाच्या पाहणीत आढळले आहे. या प्रकरणी आता दोन आठवड्यानंतर मुंबई महापालिकेने नारायण राणे यांना कारणे दाखवा नोटीस बजावली आहे. 

केंद्रीय मंत्री नारायण राणे यांनी 2009 मध्ये बांधलेल्या जुहू येथील आधीश बंगल्यात बेकायदेशीर बांधकाम केल्याची तक्रार मिळाल्यानंतर मुंबई महापालिकेच्या इमारत प्रस्ताव आणि इमारत कारखाने विभागाच्या संयुक्त पथकाने दोन आठवड्यापूर्वी बंगल्याची पाहणी केली होती. या पथकात के- पश्चिमचे साहायय्यक आयुक्त पृथ्वीराज चौहान यांच्यासह अभियंते अधिकाऱ्यांसह नऊ जणांचा समावेश होता.

या पाहाणीत संबंधित बंगल्यात 9 ठिकाणी बेकायदा बदल केल्याचे आढळून आले आहे. त्यामुळे या प्रकरणात आता नारायण राणे यांना नोटीस पाठवण्यात आली आहे. हे बांधकाम महापालिकेने दिलेल्या मुदतीत न हटवल्यास महापालिकेच्या वतीने बंगल्यावर कारवाईची शक्यता वर्तवण्यात येत आहे.

दुसरीकडे दिशा सालियन संदर्भात राणे यांनी केलेल्या आरोपांप्रकरणी नारायण राणे आणि नितेश राणे यांची पोलिसांनी तब्बल 9 तास कसून चौकशी केली आहे. त्यामुळे नारायण राणे यांना 9 चा फेरा पडला की काय अशी चर्चा आता सुरू झाली आहे.

या 9 ठिकाणी करण्यात आले बदल

>>पहिल्या मजल्यावरील उद्यानासाठीच्या जागेत रूम

>>दुसऱ्या मजल्यावरील उद्यानासाठीच्या जागेत रूम

>>तिसऱ्या मजल्यावरील उद्यानाच्या जागेत रूम

>>चौथ्या मजल्यावर टेरेस उद्यानासाठीच्या जागेत रूम

>>पाचव्या मजल्यावर टेरेस उद्यानासाठीच्या जागेत रूम

>>सहाव्या मजल्यावर टेरेस उद्यानासाठीच्या जागेत रूम

>>आठव्या मजल्यावरील पॉकेट टेरेसमध्ये रूम

>>टेरेस फ्लोअरचा रूम म्हणून वापर

>>पार्किंगमधील बेसमेंट सर्व्हिस भागाचा राहण्यासाठी वापर

मुंबई महापालिकेकडून नारायण राणे यांना नोटीस बजावण्यात आली आहे. नारायण राणे यांच्या अधिश बंगल्याची पाहणी महापालिकेच्या अधिकाऱ्यांनी केली होती. नारायण राणे यांना ही दुसऱ्यांदा नोटीस देण्यात आली आहे. जुहू येथील आधिश बंगल्यातील अनधिकृत बांधकाम करण्यात आल्याचा दावा करण्यात आला आहे.

एफएसआयचं उल्लंघन झाल्याचा दावा

मुंबई महापालिकेनं यावेळी नारायण राणे यांना नोटीस पाठवताना फ्लोअर नुसार पाठवली आहे. बंगल्याच्या बांधकामात एफएसआयचं उल्लंघन झाल्याचा दावा महापालिकेच्या वतीने करण्यात आला आहे.