मुंबई : महाराष्ट्र राज्य मार्ग परिवहन महामंडळाने एसटी ST कर्मचाऱ्यांसाठी ड्युटीच्या वेळेत मोबाईल आणि समाजमाध्यमांच्या वापराबाबत कडक सूचना दिल्या आहेत. एसटी ST बसचे चालक, वाहक तसेच अन्य कर्मचाऱ्यांनी ड्युटीवर असताना रील, व्हिडिओ, छायाचित्रे किंवा समाजमाध्यमांसाठी रील तयार करू नये, अशा सूचना देण्यात आल्या आहेत.
ड्युटीच्या वेळेत कर्मचाऱ्यांचे लक्ष कामाऐवजी समाजमाध्यमांकडे वळल्यास प्रवाशांची सुरक्षितता, सेवेची गुणवत्ता आणि महामंडळाची प्रतिमा प्रभावित होऊ शकते. त्यामुळे कामाच्या वेळेत कर्मचाऱ्यांनी आपले संपूर्ण लक्ष कर्तव्यावर केंद्रित करावे, असे महामंडळाने स्पष्ट केले आहे.
प्रवाशांच्या सुरक्षिततेला सर्वोच्च प्राधान्य
एसटी बस चालकाची प्रमुख जबाबदारी प्रवाशांची सुरक्षित वाहतूक करणे आहे. वाहन चालविताना मोबाईलचा वापर, चित्रफिती तयार करणे किंवा समाजमाध्यमांवरील इतर उपक्रमांमुळे चालकाचे लक्ष विचलित होऊ शकते. त्यामुळे ड्युटीच्या काळात अशा प्रकारचा मोबाईल वापर टाळण्याच्या सूचना देण्यात आल्या आहेत.
विशेषतः बस चालविताना मोबाईलवर चित्रण करणे किंवा छायाचित्रे काढणे धोकादायक ठरू शकते.
एसटीची मालमत्ता वैयक्तिक प्रसिद्धीसाठी वापरू नये
महामंडळाच्या सूचनांनुसार, एसटी बस, आगार, शासकीय गणवेश किंवा महामंडळाच्या अन्य मालमत्तेचा वैयक्तिक प्रसिद्धीसाठी वापर करू नये. अधिकृत कामाशी संबंधित माहिती आणि वैयक्तिक समाजमाध्यमांवरील प्रसिद्धी यामध्ये स्पष्ट अंतर ठेवण्यावर भर देण्यात आला आहे.
नियम मोडल्यास शिस्तभंगाची कारवाई
ड्युटीच्या वेळेत समाजमाध्यमांसाठी सामग्री तयार करणे किंवा सेवाशिस्तीचे उल्लंघन केल्याचे आढळल्यास संबंधित कर्मचाऱ्यावर नियमानुसार शिस्तभंगाची कारवाई होऊ शकते. यापूर्वीही ड्युटीच्या वेळेत रील तयार केल्याप्रकरणी एसटी कर्मचाऱ्यांवर कारवाई झाल्याची उदाहरणे आहेत. पनवेल आगारातील तीन कर्मचाऱ्यांवर अशाच प्रकारामुळे निलंबनाची कारवाई झाल्याचे सांगितले जात आहे.
कर्मचाऱ्यांमध्ये नाराजी
महामंडळाच्या या निर्णयामुळे काही कर्मचाऱ्यांमध्ये नाराजी व्यक्त होत आहे. ड्युटीमध्ये अडथळा आणणाऱ्या किंवा प्रवाशांच्या सुरक्षिततेला धोका निर्माण करणाऱ्या कृतींवर कारवाई करण्यास विरोध नसला, तरी समाजमाध्यमांचा वैयक्तिक वापर आणि ड्युटीवरील गैरवापर यामध्ये स्पष्ट फरक करावा, अशी कर्मचाऱ्यांची भूमिका असल्याचे सांगितले जात आहे.
मात्र, महामंडळाच्या दृष्टीने ‘रीलपेक्षा प्रवाशांची सुरक्षितता आणि एसटीची सेवा महत्त्वाची’ असा स्पष्ट संदेश या सूचनांमधून देण्यात आला आहे.
